काठमाडौं ४ चैत्र । सन् २०२२ सम्मका लागि एकदिवशीय मान्यता पाएर सर्वत्र चर्चा कमाएको नेपाली टिम सोमबार साँझ स्वदेश फर्किने भएको छ। जिम्बाम्बेमा शानदार प्रस्तुती दिएर धेरैको मन जित्न सफल नेपाली क्रिकेट टिम सोमबार साँझ ६ बजे काठमाडौं आइपुग्नेछ । नेपाली टोली जिम्बावेबाट इमिरेट्स विमानमा युएई हुँदै काठमाडौ ओर्लिने तयारी गरेको नेपाली टोलीका म्यानेजर रमण सिवाकोटीले जानकारी दिए।
नेपाली क्रिकेटको इतिहासमा अहिलेसम्मकै ठूलो सफलता हात पारेको नेपाली टिमको स्वागतमा विमानस्थलमा समर्थकको भीड लाग्ने अपेक्षा गरिएको छ ।
नेपाली क्रिकेट टिमका खेलाडीहरुलाई स्वागत गर्न क्रिकेटसँग सम्बन्धीत ब्यक्तिहरु पनि विमानस्थल पुग्ने बुझिएको छ। शनिबार नेदरल्याण्ड्ससँग ४५ रनले पराजित भएपछि नेपाल आठौं स्थानमा रहँदै जिम्बाम्बे यात्रा टुंगीएसँगै नेपाली टिम स्वदेश फर्किने तयारी गरेको हो ।
