काठमाडौ२४ पुस। प्रहरीले ब्लु स्टार ओभरसिजका सञ्चालकलाई ठगीको आरोपमा पक्राउ गरेको छ। महानगरीय अपराध महाशाखाको टोलीले राम घिमिरे र संजय उप्रेतीलाई पक्राउ गरेको हो।
उनीहरुले विभिन्न मानिसहरुलाई वैदेशिक रोजगारीमा पठाइदिने भन्दै १० लाख ६५ हजार रुपैयाँ उठाएर फरार भएपछि पीडित युवाहरुले प्रहरीमा उजुरी दिएपछि पक्राउ गरेको हो।
उजुरी दिएपछि मेनपावर कम्पनीमा पुगी चेक गर्दा विभिन्न व्यक्तिहरुको नाममा रहेको राहदानी ३७१ थान, भिसा ईन्ट्री रजिष्टर, स्वीकृत नलिएका डिमान्ड लेटरहरु, विभिन्न व्यक्तिहरुले आईएमई गरेका रसिदहरु र रकम लेनदेनसँग सम्बन्धित फाईल लगायतका कागजातहरु बरामद गरेको थियो।
पीडितबाट गुनासो आउन थालेपछि मेनपावर कम्पनीको कार्यालय रहेको स्थान बाग्मती खोलाबाट कम्पनीको कार्यालय समेत सिनामंगल शक्तिमार्गस्थित एउटा घरमा सारेको थियो। उनीहरुले रकम लिई भर्पाई समेत नदिई राहदानीहरु संकलन गरी वैदेशिक रोजगारको लागि नपठाई रकम र राहदानी समेत फिर्ता नदिई ठगी गरेको भेटिएको हो।
(बिजमाण्डूबाट)
