निर्वाचन आयोगले आगामी मंसिर १० गते हुने पहिलो चरणको प्रदेशसभा र प्रतिनिधिसभा सदस्य निर्वाचनको तयारी पूरा भएको जनाएको छ।
पहिलो चरणअन्तर्गत् पूर्वको ताप्लेजुङदेखि पश्चिमको दार्चुलासम्मका हिमाली र उच्चपहाडी ३२ जिल्लामा मतदान हुँदैछ ।
पहिलो चरणमा ३२ जिल्लामा प्रत्यक्षतर्फ प्रतिनिधिसभाका लागि ३७ र प्रदेशसभाका लागि ७४ सदस्यका लागि मंसिर १० गते मतदान हुन लागेको हो ।
पहिलो चरणमा निर्वाचन हुने ३२ जिल्लामा ३२ लाख २८ हजार ८७९ मतदाता रहेका छन् ।
पहिलो चरणको प्रदेशसभा सदस्यका लागि ४८१ र प्रतिनिधिसभा सदस्यका लागि ३२२ गरी ८०३ जना उम्मेदवारहरु चुनावी मैदानमा छन् ।
पहिलो चरणको निर्वाचनका लागि २ हजार ९१९ मतदानस्थल र ४ हजार ४६५ मतदान केन्द्र कायम गरिएको छ । पहिलो चरणको निर्वाचनका लागि ४५ हजारभन्दा बढी कर्मचारी खटिएका छन् ।
निर्वाचन सुरक्षाका लागि नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान विभागका कर्मचारी गरी करिब ३ लाख सुरक्षाकर्मी परिचालन गरिएको छ।
पहिलो चरणमा सबैभन्दा धेरै मतदाता ३ नम्बर प्रदेशमा छन् भने सबैभन्दा कम ५ नम्बर प्रदेशमा ।
पहिलो चरणमा दुई निर्वाचन क्षेत्र रहेका नुवाकोट, सिन्धुपाल्चोक, धादिङ, गोरखा र बाग्लुङ गरी ५ जिल्ला रहेका छन् ।
पहिलो चरणमा प्रदेश नम्बर–१ का ७ जिल्लामा प्रतिनिधिसभाका ७ र प्रदेशसभाका लागि १४ सदस्यका लागि मतदान हुँदैछ।
प्रदेश नम्बर–२ का कुनैपनि जिल्लामा पहिलो चरणमा चुनाव हुने छैन।
यस्तै, प्रदेश नम्बर–३ मा ६ जिल्लाका ९ प्रतिनिधिसभा र १८ प्रदेशसभा सदस्यका लागि निर्वाचन हुँदैछ।
पहिलो चरणमा प्रदेश नम्बर–४ का ६ जिल्लामा ८ प्रतिनिधिसभा र १६ प्रदेशसभा सदस्यका लागि मतदान हुँदैछ।
प्रदेश नम्बर–५ मा प्रतिनिधिसभाका २ र प्रदेशसभाका ४ सदस्यका लागि निर्वाचन हुँदैछ।
पहिलो चरणको प्रदेशसभा र प्रतिनिधिसभा निर्वाचनका लागि प्रदेश नम्बर–६ का ७ जिल्लामा ७ प्रतिनिधिसभा र १४ प्रदेशसभा सदस्यका लागि मंसिर १० गते निर्वाचन हुँदैछ।
यस्तै, प्रदेश नम्बर–७ का ४ जिल्लामा ४ प्रतिनिधिसभा र ८ प्रदेशसभा सदस्यका लागि पहिलो चरणमा मंसिर १० गते निर्वाचन हुँदैछ।
निर्वाचन आयोगका प्रवक्ता नवराज ढकालले पहिलो चरणको निर्वाचनका लागि केन्द्रबाट गर्नुपर्ने सम्पूर्ण काम पूरा भएको र मतदान केन्द्रकेन्द्रित कामहरु सुरु भइसकेको जानकारी दिए।
निर्वाचन आयोगले उच्च हिमाली भेगमा हिउँ परेको कारण तल्लो क्षेत्रमा झरेका मतदाताका लागि अस्थायी मतदान केन्द्रको व्यवस्था मिलाएको जनाएको छ।
